Siunertaq
Meeqqat atuartut uippallertarnerannut, aliasunnerannut nalaassimasanillu kingunerluuteqarnerminni qisuariartarnerannut suut peqqutaanersut qanorlu taakkua aqunneqarsinnaaneri pillugit ilinniartitsisut ilinniartinneqarlutillu paasisimasaqartilerneqassapput.
Saaffigisat
Atuarfik ataaseq
Atuarfiup ilinniartitsisui aqutsisuilu
Peqataasussanut piumasaqaatit
Pikkorissaaneq atuarfimmi ingerlanneqartussaammat, ilaatigut inoqarfiit minnerusut attuumassuteqartunit sulisut peqatigalugit, pikkorissaanermi ilinniartitsisut aqutsisullu suleqatiginerisigut imarisassat toqqarneqarlutillu salliunneqassapput, taakkua tassaapput ataani allassimasut.
Imarisai
Ajornartorsiutip qanoq issusia:
Atuartut sumiginnagaanermik, toqusoorsimanermik, kinguaassiuutitigut atornerlunneqarnermik, angajoqqaat avinnerannik imaluunniit peroriartornerminni nalaani uippallernermik misigisaqarsimasut tassanngaannaq peqqarniitsumik sakkortuumillu qisuariarsinnaasarput. Atuartut qisuariarnerat eqqarsaatersortarnikkut sumiginnagaanertut aamma paasineqarsinnaapput.
Tamanna meeqqanut nappaatiminnik suussuserfigineqarsimanngitsunut aamma atuussinnaavoq, soorlu ADHD, imaluunniit attaveqarsinnaannginneq (autimespektrumforstyrrelse), taakkua aamma tassanngaannaq peqqarniitsumik qisuariarsinnaasarput.
Atuarfimmi sulisut qanoq isillutik pissusilersorneq tamanna paasisinnaavaat taamaasillutillu pisumi tassani, tarnikkut ikiueqqaarnikkut mentaliseringilu atorlugu akuliunnikkut, qanoq naapertuuttumik qisuariarsinnaappat?
Qulaani allassimasutut qisuariartarnernut peqqutaasinnaasunik taakkualu aqussinnaanissaanut atortussanik pissarsinissamut pikkorissarneq periarfissiissaaq. Tarnikkut ikiueqqaartarnermi aamma mentalisering atorlugu akuliuttarnerni siunertarineqartoq tassaavoq meeqqat aamma atuarfimmi suliamik ilinniarsimasut inersimasut akunnerminni atassuteqarnerisa qulakkeerneqaqqinnissaa.
Pikkorissaaneq immikkoortunik ukuninnga imaqartinneqarsinnaavoq:
- Sumiginnagaanerup suuneranik ilisimasaqarnissaq, tamassumunnga ilanngullugu kinguaassiuutitigut atornerlunneqarnerit, minnerunngitsumillu tamakkua meeqqap ineriartorneranut sunniuteqartarneri kiisalu sumiginnagaaneq aamma kinguaassiuutitigut atornerlunneqarsimaneq pissutaallutik qisuariaataasarsinnaasut pillugit ilisimasaqarnissaq.
- Tassanngaannartumik toqusoornermut, angajoqqaat avinnerannut minnerunngitsumillu pisunut, ilaqutariit iluanni annertuumik allannguititsisunut atatillugu, qisuariaataasinnaasartut pillugit ilisimasaqarnissaq.
- Mentaliseringimut teori pillugu ilisimasaqarnissaq, tamassumunnga ilanngullugu mentaliseeriiunnaartoortarneq.
Imarisat sorliit qulaani allassimasut arlaat toqqarneqaraluarunilluunniit, atuarfiup avataaniittunik sorlernik suleqateqartoqarnera aamma sorlernik sillimasuuteqartoqarneranik kiisalu suleqatigiinneq/sillimaniarneq tamanna qanoq ingerlanersoq eqqartueqatigiinnermi ilanngunneqassapput. Aamma qanoq isilluni suleqatigiinneq nukittorsarneqarsinnaava?
Qulaani allassimasunik qanorluunniit pikkorissaanermi pingaarnersiuisoqaraluarpat atortussat ukua ilanngunneqassapput:
Meeqqat qulaani allassimasutut pisumi tassanngaannaq qisuariarpata inersimasoq/suliamik ilinniarsimasoq qanoq isilluni naapertuuttumik qisuariassava? Tamanna erseqqissarneqarluni atortussat makkua atornerisigut sungiusaatigineqassaaq:
- Tarnikkut ikiueqqaartarnermut ilitsersuut tigussaasoq: Najuunneq, isumassuineq aamma tusarnaarneq, kiisalu oqaloqatigiinneq artornartoq
- Mentalisering atorlugu akuliunnerit
- Pitsaaliuisunik sammisaqartitsinernik/tarnit pissusaannik ilinniartitsinernik assersuutit, tassani atuartut ilinniartitsisullu mentaliseriinissamut piginnaasaat pitsanngorsaavigineqassapput
- Aaqqiagiinngissutinik suliaqarneq
Atortussat qulaani allassimasut amerlasuunik siunertaqarput:
- Tassanngaannartumik qisuariarneq/nalaassimasamik kingunerluuteqarnermi tassanngaannartumik qisuariarneq piffissami tassanerpiaq isumagineqassaaq.
- Atuartoq naatsorsuutigisatut atuarfimmut uteqqissaaq, immaqa aqaguani, ullorlu atuarfiusoq qanoq isikkoqassava?
Pikkorissarnerup aaqqissugaanera
Pikkorissaanermi immikkoortumi siullermi Ilinniarfissuarmit pikkorissaanermi ilinniartitsisut/aqutsisut suleqatiginerisigut suliassaqarfiup iluani sammisat aalajangersimasut atuarfiup toqqarsimasai pillugit saqqummiisoqartassaaq. Atortussat tigussaasut aammattaaq ilisaritinneqassapput, taakkua pikkorissaanermi immikkoortumi siullermi sungiusaassutigineqarlutillu pikkorissaanermi immikkoortup siulliup aappaatalu akornanni atorneqassapput.
Pikkorissaanerit taakkua marluk akornanni atuarfiup sulisuisa ataasiarlutik-marloriarlutik naapinnissaat, nalilersuinissaat isummersoqatigiinnissaallu innersuussutigineqarpoq. Pikkorissaanermi ilinniartitsisut/aqutsisut Zoomikkut peqataasinnaapput aamma/imaluunniit sulisut ataatsimut isummersoqatigiinnissaannut apeqqutit atugassaannik tunniussisinnaapput. Ataatsimiinnerit pillugit allalluni eqikkaasoqassaaq, suliaqarfiup iluani iluatsilluarsimasut aamma suli unammillernartut allattorneqassapput taakkualu pikkorissaanermi ilinniartitsisunut/aqutsisunut anngunneqassallutik. Eqikkaalluni allatat taakkua ilaatigut pikkorissaanerup immikkoortuata aappaani toqqammavigineqassapput.
