Anguniagaq
Meeqqat, inuusuttut inersimasullu tassanngaannartumik peqqarniitsumillu qisuariartarnerannut peqqutaasup qanoq isilluni paasineqarsinnaanissaa anguniarneqarpoq. Qisuariarnerit taakkua sumit aallaaveqarnersut kiisalu eqqarsaatersortarnermik paasinninnikkut akulerulluni qanoq iliuuseqartoqarsinnaanera pikkorissaanermi sammineqassapput.
Saaffigisat
Pikkorissaaneq atuarfimmut tamarmut saaffiginnippoq atuarfiullu sulisuinut immikkut atuartitsinermik suliassaqarfiata iluani suliaqartuusunut.
Peqataasussanut piumasaqaatit
Suliassaqarfimmut soqutiginnittut tamarmik peqataasinnaapput
Imarisai
Atuartut sumiginnaanermik, toqusoorsimanermik, kinguaassiuutitigut atornerlunneqarnermik, angajoqqaat avinnerannik imaluunniit peroriartornermik nalaani uippallernermik misigisaqarsimasut tassanngaannaq peqqarniitsumik sakkortuumillu qisuariarsinnaasarput. Qisuariarnerit taakkua eqqarsartaatersortarnikkut sumiginnagaanermik aamma taaneqarsinnaapput.
Qulaani allassimasut meeqqanut nappaatiminnik suussuserfigineqarsimanngitsunut aamma atuussinnaapput, nappaatit soorlu ADHD imaluunniit attaveqarsinnaannginneq (autimespektrumforstyrrelse), meeqqat taakkua aamma tassanngaannaq peqqarniitsumik qisuariarsinnaasarput.
Qisuariartarnernut qulaani allassimasunut peqqutaasartut pikkorissaanermi assigiinngitsunik akissutissarsiffigineqassapput, tamassumunnga ilanngullugu nalaassimasamik kingunerlutsitsineq aamma kingunerlutsitsinermi qisuariarnerit.
Mentalisering atorlugu akuleruttariaatsit tigussaasut pikkorissarnermi aallutissavagut. Peqataasut mentaliseringip atornissaanut nammineq piginnaasamik aamma atuartut mentaliseringimik atuisinnaaneri qanoq isillutik nukittorsarsinnaaneraat peqataasut aammattaaq aallutissavaat. Meeqqat ataasiakkaat aamma klassimi atuaqatigiit qitiutinneqassapput. Kiisalu pikkorissarnermi mentalisering aallaavigalugu angerlarsimaffiup atuarfiullu akornanni oqaloqatigiinneq sammineqassaaq.
Pikkorissarnerup immikkoortuisa marluk akornanni peqataasut mentalisering atorlugu akuleruttariaatsinik assigiinngitsunik misilinnissaannut periarfissaqassapput tamassumalu kingorna isummersoqatigiissallutik.
