Teknologiimik pikkorissarneq Modul 1 aamma 2

Pikkorissaanissami siunertarineqarpoq pikkorissaqataasut teknologiit assigiinngitsut atuartitsinerminnut ilanngunneqartarnissaanut ilisimasaqarnerulernissaat Atuarfik Digitaliusumilu periusissiap taperserneqarnissaa.

Anguniagaq

Pikkorissarnermi alapernaassuseq isumassarsisitsinerlu fagini arlariinni ukioqatigiiaanilu assigiinngitsuni atuartitsinermi teknologiit nutaaliorsinnaanermut, misissuinermut nutaanillu pilersitsinermut qanoq atorneqarsinnaanerat pillugu siunersioqatigiinnermik isumassarsianillu avitseqatigiinnermik ilallit pingaartinneqarput.

Teknologiit pikkorissarnermi suliaqarfigineqartut Ilinniartitaanermut Aqutsisoqarfimmi atorniarneqarsinnaapput.

Pikkorissarnerup – siunissaq ungasinnerusoq eqqarsaatigalugu – kinguneqarluarnissaa qulakkeerniarlugu pikkorissarneq ineriartortissimavarput modulinut marlunnut avillugu.

Saaffigisat

Fageqatigiit, alloriarfikkuutaat, aqutsisut imaluunniit atuarfimmi ilinniartitsisut tamakkerlugit

Pikkorissarnerup imai

Modulimi siullermi teorii (ilusilersuinerup ingerlarnga) assassornerlu peqataasut teknologiinik assigiinngitsunik, atuarfinni fagiusuni tamani ilusilersuisinnaanermik, nutaaliorsinnaanermik, pilersitsisinnaanermik projekteqarlunilu suliaqarsinnaanermik periarfissiisunik, suliaqarnerisigut kattunneqassapput.

Modulip aappaani ilusilersuinerup ingerlarnga, C.R.A.F.T aamma teknologiit Ilinniartitaanermut Aqutsisoqarfiup atorniartarfiani pissarsiassaasut tunngavigissavagut. Modulip aappaani pikkorissaqataasut suliaqaqataatinneqarnerisigut ilusilersuinerup ingerlarngata C.R.A.F.T-illu ilikkartitsiniarnermut atorneqarsinnaanerinik paasisitsisoqassaaq. C.R.A.F.T-ip ilanngunneqarnerani siunertarineqartoq tassaavoq pikkorissaqataasut ilisimalissagaat atuartitsissutigisartakkamik matumani pikkorissarnermi suliarineqarmata.

Modul 1.

- Sooq teknologiit tusagassiuutillu digitaliusut atuartitsinermut ilanngunneqartarnissaasa pingaaruteqarnerinik nassuiaaneq.

- Teoriinik (ilusilersuinerup ingerlarnganik C.R.A.F.T-imillu) assassornermik tunngaveqarluni ilisarititsineq.

- Teknologiinik pissarsiarisinnaasatsinnik assigiinngitsunik ilisarititsineq teknologiillu katersorneqarsimasut aallaavigalugit teknologiinik misileraaneq.

- Elevnøglit 2000-ikkunni atuartut piginnaasarisassaasa ineriartornerisa nalilersornissaannut atorneqartussat ilisaritinnerat.

- Teknologiit atuartitsinermit modulillu aappaani misilerarsimasat ilanngunnerisigut nammineerluni uv-planiliorneq.

Modul 2.

- Misileraalluni uv-p ingerlassimaneranik imminut nalilersorneq.

- Atuartut piginnaasaasa ineriartorneri pillugit elevnøglit allaavigalugit oqallinneq.

- Elevnøglit atorneqarsinnaassusiannik nalilersuineq – naleqqussarneqartariaqarpat?

- Teknologiinik assigiinngitsunik misileeqqinneq.

- Uv-planinik teknologiinik ilanngussiviusunik arlalinnik suliaqarneq.

- Pikkorissarnerup kingornagut atuartitsinerup teknologiimik ilanngussiviusup qanoq ililluni imminik ingerlasunngorsinnaanera pillugu oqallinneq.

Modulini suliaqarneq

  • Pikkorissartussat angajoqqaat akuersillutik atsiornissaat isumagissavaat, taamaalillutik atuartut assilineqarneri immiunneqarnerilu atorneqarsinnaassapput.
  • Uv-planinik misileraaneq.
  • Teamsikkut suleqatinik siunersiueqateqarneq.
  • Elevnøglit allaavigalugit atuartut piginnaasaasa ineriartornerinik ingerlaavartumik nalilersuineq.

    Om

    2021-10
    Kalaallisut / Danskisut
    Uddannelsesstyrelsen
    Ilinniarnermik Ilisimatusarfimmi imaluunniit Ilinniartitaanermut Aqutsisoqarfimmi ilinniartitsisut fagimulluunniit siunnersortit.
    Nunami immikkoortortami najukkamiluunniit
    Atuarfiup kiisalu Ilinniarnermik Ilisimatusarfiup Ilinniartitaanermulluunniit Aqutsisoqarfiup isumaqatigiinnerisigut.
    Qinnutqarnissamut killiliusssaq: 1. marts 2021
    Ikinnerpaamik 7
    Teknologiimik pikkorissarneq ukiumik ataatsimik sivisussuseqassaaq, pikkorissarnerlu modulinut marlunnut ullunik tallimanik sivisussusilinnut avinneqassaaq.